بحبك يا بلدي

10:14 ص |

بحبك يا بلدي

ومش عارف الحب دا هيوديني فين
بترميني باديكي
ومش عارف بتديني لمين
وبتحرقي في قلبي
وبتكوي جوايا الحنين
وبتقيدي جوايا الكُره والأنين

***
يا أرض النيل
ياللي سقيتي ولادك
الحسرة والألم
ياللي لطمتي علي خدودهم
ألف مليون قلم
وهما اللي دايما
رافعين لك العلم
وردك عليهم كان ذل وألم
يا مهد الحضارة
وأرض النعم

***
ولسة بحبك بس خايف
خايف أقولها
تدبحيني
زي اللي قلبي
تعمليها وتبعيني
ومن حنانك وطيبتك
تجرديني
وترميني في شوارعك
وتضيعيني
وتحدفيني في بحر الحياة
أحاول أطلع
تغرقيني
وبتلوميني علي حبي ليكي ؟
وبتسيبيني ؟
ما أنا اللي غلطان مـ البداية
لأن حبك كان عميني

***
لكني بحبك
ومش هسيبك
ومش هسيب الديابة
تنهش في لحمك
ومش هسيبها تنجس ترابك
ومش هسمح لها تدق بابك
ولا هسمح لها تضيع شبابك
وهستحمل يا بلدي عشانك عذابك

***
يا أرض الوطن
يا أعظم وطن
ايدك في ايدي نعدي المحن
ونكسر ظلامك نخطي الزمن

***
يا أرض الأمان
يا كل الحنان
خطوة بخطوة نهد الحيطان
ونرفع يا بلدي صوت الأذان
ونرسي بسفينتك لبر الأمان
وعهدي اليكي أعدم السجان
وأحيي أسودك
وأعلي جنودك
وأرجع حدودك
وأنفض الأحزان
بحبك يا بلدي

**********************
بقلم أخوكم
نور الدرب
محمـ أبووردة ــد

زيارتك لنا تسرنا وتعليقك يسعدنا فشاركنا ولا تقرأ وترحل دون أن تترك بصمتك (نشرات rss)

التسميات: بقلمي

5 التعليقات:

جايدا العزيزي يقول...: ***
لكني بحبك
ومش هسيبك
ومش هسيب الديابة
تنهش في لحمك
ومش هسيبها تنجس ترابك
ومش هسمح لها تدق بابك
ولا هسمح لها تضيع شبابك
وهستحمل يا بلدي عشانك عذابك

***

الله يفتح عليك يا نور الدرب

هو ده احساسنا تجاه مصر

مهما عملت فينا

بنصرخ بعلو الصوت بنحبك يا مصر

ابدعت

تحياتى; 9 ديسمبر 2010 في 8:03 ص
غير معرف يقول...: السلام عليكم و رحمة الله و بركاته

ان شاء الله تمام أردة ان أدعو كل أصدقاء مدونتكم المتواضعة لزيرة مدونتي و المشاركة في الموضوع الجديد الدي عرضته

في انتضار زيارتكم تقبلو مني فائق الاحترام و التقدير

سلام; 10 ديسمبر 2010 في 4:09 م
محمد أبووردة يقول...: جايدا العزيزي
دايما مرورك بينور المدونة
سعدت جدا بمرورك وتعليقك
وفعلا كلنا بنحب مصر
وان شاء الله مش هنسيبها ابدا تتجرع كأس الذل والمهانه; 11 ديسمبر 2010 في 5:45 ص
محمد أبووردة يقول...: أخي صاحب مدونة الامل
يشرفني التبادل الاعلاني معك اخي
ارسل لي بنر المدونة الخاصة بك
وياريت يكون مقاس 200x60; 11 ديسمبر 2010 في 5:46 ص
غير معرف يقول...: السلام عليكم و رحمة الله و بركاته أخي الكريم المشرف على المدونة

أن صاحب مدونة الأمل أردت أن أدعيك لزيارة مدونتي و ترك بصمتك فيها و الادلاء على رأيك فيها

تقبل مني فائق الاحترام و التقدير; 21 ديسمبر 2010 في 6:31 م