Pages

من أنا

صورتي
..( محمد أبووردة ).. قلم حر يحب بلده ووطنه ويتمني الخير له مهما حدث له به يخشي عليه من الذل والانكسار يعشق الحرية ويحلم أن يرفرف في سمائها

اضف اهداء

أضف " قلم حر " إلي مدونتك

اسرة مع بعضينا

تحدث معي مباشرة

الساعة كام دلوقتي ؟




زواري حبايبي

المتواجدون الآن

النهارده ايه ؟؟

plz, call me


بعض الشبهات التي تدور في الشارع المصري وفي العلام حول ما يحدث في مصر والرد عليها


يعني مش قادرين تستنوا ست شهور كمان ,, جت علي 6 شهور ؟؟


الست شهور دول مش عشان مبارك

دول عشان كسر شوكة الشعب المصري اللي أثبت إنه ممكن ينهش اي حد يدوس علي شعرة من مصر

الست شهور دول مهمين جدًا لأمريكا

لو مبارك فضل الست شهور دول هيظبط إن اللي يمسك مصر بعديه يكون تبع أمريكا

إنما لو حكومة وطنية انتقالية هي اللي مسكت من دلوقتي لأنها هتكون نزيهة هتخضع تحت إشراف القضاء و المحكمة الدستورية و هتحل مجلس الشعب الفاسد

و هتبقي نزيهة جدًا فهيخافوا يا تري اللي هيمسك هيبقي ليه الولاء لأمريكا و لا حر

و ده اللي مخليهم سندينه

و هتشوفوا لو كمل ,, أزاي هيحاول يكسر الشعب تاني زي ما عيشه ساكت طول عمره

يشوف الظلم و يسكت ,, اما كان الشرطة تعمل اللي تعمله

و رجال المرور اللي بياخدوا إيتاوة من السواقين و أحنا برده ساكتين

يا شباب مبارك كبير في السن أحترامًا سيبوه ست شهور كفاية إنه خدم مصر 30 سنة ؟؟

مبارك لم يخدم إلا نفسه

قانون الطوارئ كان في خدمة مين ؟

أمن الدولة هل كان أمن للشعب و لا أمن للنظام ؟

هل ضحايا العبارة و القطارات اخدوا حقهم

هل دايرة الفساد و الرشوة و التحكم فينا كانت بتخدمنا ؟

هل خالد سعيد كان تاجر مخدرات

هل السيد بلال هو اللي عمل أحداث اسكندرية الظالمة

أحمد عز و اللي أكله من دم الغلابا كان عشان مصر

و اللي اخدوا مجلس الشعب

و القوانين اللي كانت بتتفصل عشانهم

ما هم رجال الأعمال و هم الوزراء و هم هم مجلس الشعب

يعني هم القوة التشريعية و التنفيذية و هم الوسطة

مبارك لو خدم مصر سنة واحدة من 30 سنة

كنا هنلاقي تقدم في الصحة أو التعليم أو الإقتصاد أو الزراعة أو الصناعة أو البحث العلمي

كنا حتي هنبقي مميزين في حاجة

الناس فرحانة بكوبري اتبني و لا ميدان اتنظف لأنهم مابيشوفوش حاجة عدلة من مبارك

و أهو اللي يجي منه أحسن منه

عايزين تقارنوا شوفوا اليابان و ألمانيا و ماليزيا و البرازيل

كانوا معانا في نفس المحن و نطوا بسبب إن تعب الشعب كان بيروح للشعب

إنما مع الخصخصة اللي بتحصل و الفساد

تعب الشعب بيروح للناس اللي فوق

يا عم حرام عليكوا الخطاب كان إيجابي جدًا ؟؟

الخطاب كان إيجابي تحت ضغط شديد جدًا من الشعب بعد أما بعتلهم الأمن و مقدرش يسيطر عليهم

الخطاب ده عشان يهدي الناس و يرجعهم من ميدان التحرير

الخطاب ده فاكر إنه بيمن علي الشعب

مع إن ده أقل حقوقنا

كمان الخطاب معملش حاجة

هل ألغي قانون الطوارئ

هل شال سطوة الحزب الوطني من علي أنفاس البلد

هل حل مجلس الشعب

هل قال الأنتخابات هتبقي تحت إشراف القضاة

و الله و بحلف إني سمعت كلمة ""أنا لا أنتوي الترشح لفترة جديدة"" قبل الفترة ده

و قال إن الحزب بتاعه متخلاش عنه و رشحوه

و كأن قفانا بيستحمل إلي ما لا نهاية

سؤال صغير هو الحداية بترمي كتاكيت ؟؟

بغض النظر عن أي شئ ابعدوا عن الفتنة الناس هتموت بعض ؟؟

الموضوع يتلخص في :

1) الأمن المركزي

2)خروج المساجين

و أنصار مبارك المسلحين(3

هم سبب القتلي و الجرحي

إنما من غيرهم المظاهرة سلمية و شوف الصور و الفيديوهات عالنت يوم التلات كانت عاملة أزاي

الجيش بيفتش عشان لو حد ماسك حتي عصاية يقوله لأ

كل ده خطة من مبارك للتمسك بالسلطة مش عشان ياكل في البلد عشان اللي قلناه في السؤال الأول

خرج المسجونين و المسجلين خطر من السجون عشان نقعد في بيتنا و نحمي شوارعنا

و بعتهم ميدان التحرير و زي مانتوا شايفين سنج و مطاوي و مولوتوف و خيول و أحصنة يقولك أهم بيضربوا في بعض

شوفوا عالنت أزاي الشباب كان مظاهرتهم سلمية تماما و الجيش بيفتشنا و أحنا داخلين و يشوف الوظيفة في البطاقة

لكن أما أنصار مبارك دخلوا الجيش بقي حيادي تماما حتي الدباباة بتولع و هم ساكتين

الأوامر بتقول كده

طيب سؤال منطقي في ناس مؤيدة تروح تجادل ناس معارضة كانوا يقفوا في مكان تاني

في متظاهر شريف ماشي بسنجة و مولوتوف

و الله من مصادر موثوقة بالحزب الوطني مش من التيليفزيون مع إنها أتقالت الناس ده مأجورة

بس الخطة بتقول إن أهل الناس ده هتقولهم ارجعوا بقي حرام عليكوا الخطاب جميل

و أصحابهم هيقولوا ياللا نسقط الفتنة

و بهذا يخمد نار غضب الشعب

فكر عسكري و ليس دبلوماسي

يا عم هيتصارعوا علي السلطة ؟؟

يعني أسيب واحد فاسد يهون عليه دمنا و يهون عليه ترويع أمننا

و يبعتلنا مساجين و مسجلين خطر لحد بيتنا عشان يتشبث بالسلطة و اقول اللي هيجي هيكون مين

الشعب دلوقتي واعي جدا و اللي هتعمله الحكومة الوطنية هيكون افضل ألف مرة منه

و لو حادت عن الحق و ده صعب الشعب مش هيسكت

و اما الدستور يتعدل و يمسك واحد إن شاء الله هيبقي عارف إن فترة الرئاسة هتبقي أربع سنين

و ممكن يتحاكم قدام القضاة في اي وقت

زي أي شعب كريم سلطته في إيديه و حرية هي رقم واحد في بلده


ليه لازم نكمل ؟؟


لازم نكمل عشان حسني أثبت غدره من بعد الخطاب بأقل من 24 ساعة

شوفوا قتل كام واحد في ميدان التحرير حفاظًا علي نفسه

و كأننا غنم عنده ,, و الله الواحد بيحافظ علي غنمه

الشعب ده شوكته مش هتتكسر يا مبارك

صحيح علمت الناس الخوف و السكوت لكن خلاص الشباب أحيوا الشعب تاني

خطابك المعسول اللي قلته و أنت مكسور مش هينسيني دم اخواني اللي ماتوا تحت رجل النظام الفاسد

و الله شفت عربية أمن ( أمن دولة مش أمن شعب مصر ) بتدوس علي ناس بقصدها في المظاهرات

مش بتاعت التحرير اللي داست عالناس بضهرها لأ في القصر العيني و معايا الفيديو و داس عليهم بوشوا و بقصده

واحد عمل كده عشان يسكت الناس الغضبانة و كنا مظاهرة سلمية اصلًا

يبقي لو طال ياكلنا هياكلنا

مصر دولة غنية جدًا ,, بس الفلوس بتروح لرجال الأعمال اللي هم الوزراء اللي هم مجلس الشعب اللي هم الحزب الوطني اللي هم العصابة اللي خصخصت أملاك الشعب ليهم

يا شباب فاضل خطوة واحدة بس

حد يستسلم عند رقبة الزجاجة و يقع في قعرها تاني

النوايا السيئة باينة جدا

باينة من ساعة ما قفل اي وسيلة أتصال التيليفون و النت

من ساعة ما أمر الأمن ( أمن الدولة مش الشعب ) إنهم يقتلوا الناس

من ساعة ما خرج المساجين عشان نروح نحمي بيوتنا

من ساعة ما بعت البلطاجية التحرير

و الله الأمر واضح و الشعب بقي واعي جدا يا مبارك مش زي زمان خالص فوووق بقي

في مسجون هرب من السجن يمسك رشاش و يمشي علي شارع الهرم يضرب بلا هدف

هو في شر مطلق ؟؟ شر من أجل الشر ؟؟ ده كان ترهيب للشعب

في مؤيدين يمسكوا أسلحة و الجيش يقعد محايد ؟؟ معلش ده الأوامر

في خطاب مفهوش تعزية للضحايا و اعتذار عن 30 سنة من فساد و ظلم و سكوت

الشباب طيب أوي و عايز مصلحة مصر أما قال لا للفتنة بس ده مش فتنة ده بلطاجية بتضرب في ناس بتقول لأ

أرجوكم قولوا لأ ماتخفوش .. مش عشان نفسك

أحنا بناكل و نشرب و نلبس و نخرج و ده من فضل ربنا علينا

قول لأ عشان ضحايا الفساد و الخصخصة و الرشوة و التعذيب و الإهانة و مص دم الغلابا و التأمين الصحي و المعاشات و التموين قول لأ عشان خالد سعيد و ألوف غيره محدش عرف عنهم حاجة

قول لأ عشان مصر

هنعمل إيه ؟؟

مظاهرة سلمية برده شباب كريم عزل برده و مش هنخاف من البلطجية و المسجونين اللي بيبعتهم

و هنقف في مظاهرة سلمية ,, في ميدان التحرير الصبح يوم الجمعة قبل الصلاة

و لو قفلوا النت و التيليفونات و لو قفلوا ميدان التحرير برده هنتقابل

و هنقول لأ ,, بالله عليكم

و أرجو من أهالينا

مايخفوش علينا ,, و يدعولنا و مايثقوش في مبارك

اللي بعت بلطجية يضربوا أولادهم

و مساجين يروعوا أمنهم

و لن تسترد تلك الثقة المفقودة بأي خطابات

و اللي عنده ضحايا في المظاهرات او اي ضحايا من النظام بطمنهم إن فاضل خطوات قليلة جدا و حقهم يرد بإذن الله

و يحتسبوا عن ربنا

و أرجو من الجيش

عدم الحيادية التامة السلبية

يا ريت يحمي المواطنين العزل من المسلحين

و أرجو من الله

اللهم أرنا الحق حقًا و ارزقنا اتباعه و ارنا الباطل باطلًا و ارزقنا اجتنابه

اللهم اجعل هذا بلدًا أمنا و ارزق أهله من الطيبات

في استخفاف شديد جدًا بشعب مصر


إن الشباب بعضهم مدرب من الموساد عن كيف تكون منقلبًا علي رئيسك

و ناس تانية بتقول إن كان في عناصر من برة مصر و عناصر إرهابية في الميدان من إيران

كلام لا ثقل له ,, مجرد فرقعات حول الموضوع للتشتيت




زيارتك لنا تسرنا وتعليقك يسعدنا فشاركنا ولا تقرأ وترحل دون أن تترك بصمتك (نشرات rss)

8 التعليقات:

بنت مصريه يقول...

فليسقط هذا النظام

ماما أمولة يقول...

اللهم أرنا الحق حقًا و ارزقنا اتباعه و ارنا الباطل باطلًا و ارزقنا اجتنابه

اللهم اجعل هذا بلدًا أمنا و ارزق أهله من الطيبات

اللهم أمين

غير معرف يقول...

الجاسوس الذي أحب اسرائيل

هذه حقيقة الفرعون الكرتوني الذي يحكم مصر الكنانة.. اصح يا مصر

http://boukerchmohamed.unblog.fr/2010/01/31/1610-28

هند سلامة يقول...

مقال رائع لمن ألقى السمع وهو شهيد..
ولكن يبدو أنهم علموا العاطفة الجياشة لشعبنا المصري فأردوا العزف على أوتارها ليخروجوا بسونفونية من تأليفهم..ولكني أعتقد أن الشعب المصري لم يعد غبياً..وليت شبابنا يصمد ويعلم أن النصر صبر ساعة..


إذا سمحتم لنا عندي سؤال بخصوص التدوين..

ما المهارت التي يجب عليّ تعلمها لأتمكن من تصميم قالب لمدونتي..؟؟وجزيتم خيراً

نور الدرب يقول...

بنت مصرية
نعم فليسقط هذا النظام
وبالفعل سقط النظام
لتفرح مصر كلها بما حدث
بلادي
يا احلي البلاد البلاد يا بلادي

نور الدرب يقول...

ماما امولة
اللهم استجب دعائك
وان شاء الله القادم سيكون اجمل مما كنا عليه

نور الدرب يقول...

هند سلامة
لم تعد العاطفة تجدي بشيء
فقد نفذت كل محاولاتهم لتهدئة الشعي المصري
وقد فشلوا بالفعل
ورحل الطغيان والفرعون عن مصر
والله اكبر ولله الحمد

محمد الجرايحى يقول...

الحمد لله
ظهر الحق وزال الباطل

استطلاع رأى

صوت مصر

أنا حر

فى قلوبنا حى يا شهيد

من درر الكلام

حرية وعدالة

الحكاية من البداية

كان لازم نثور

الحرية لشرفاء الوطن

الحرية لشرفاء الوطن